 Gruppi li jaħdmu favur id-drittijiet ta' persuni LGBT qegħdin jinsistu mal-President tal-Federazzjoni tal-Futbol tal-Kroazja biex fil-logħba ta' kwalifikazzjoni għall-Euro 2012 bejn il-Kroazja u Malta, li se tintlagħab illum, l-Erbgħa, ixejjer il-'bandiera tal-qawsalla' bħala sinjal li tassew iddispjaċih għar-rimarki dispreġjattivi li għadda fil-konfront ta' persuni 'gay'.
Vlatko Markovic (ritratt) qanqal ferment sħiħ meta waqt intervisti li ta lill-ġurnal ta' kuljum "Vacernji list" u lill-gazzetta tal-Ħadd, "Vecernje novosti", hu ddikjara: "Sakemm nibqa' jien president (tal-federazzjoni tal-futbol) ma jkun hemm l-ebda plejer 'gay'. Għall-grazzja t'Alla persuni sani biss jilagħbu l-futbol."
Għaqdiet li jaħdmu għall-ħarsien u t-tisħiħ tad-drittijiet tal-bniedem madwar l-Ewropa, fuq quddiem nett gruppi 'gay' u liżbjani, saħqu mal-awtoritajiet sportivi li għandhom jieħdu azzjoni dixxiplinarja fil-konfront tal-President tal-Federazzjoni tal-Futbol tal-Kroazja Markovic għall-kummenti tiegħu li plejers 'gay' m'għandhomx jitħallew jilagħbu għal pajjiżhom.
Il-kummenti magħmulin minn Markovic ikkonfermaw il-fatt li l-omofobija għadha ssib art għammiela fil-qasam sportiv. L-European Gay and Lesbian Sport Federation (EGLSF), li tirrappreżenta 17,000 persuna, kemm irġiel kif ukoll nisa, li huma attivi f'xi qasam jew ieħor ta' sports, qiegħda tmexxi l-appell biex tittieħed azzjoni legali kontra Markovic, waqt li sejħet lill-UEFA biex tagħti bidu għal proċeduri dixxiplinari kontrih.
L-Ewro-Parlamentari Awstrijakk Ulrike Lunacek, li huwa membru tal-grupp tal-Ħodor u parteċipant attiv fil-Gay Games, wissa li jekk il-Gvern Kroat jonqos milli jieħu azzjoni kontra Markovic, allura d-dikjarazzjonijiet li għamel jistgħu jaffettwaw l-applikazzjoni ta' pajjiżu biex tissieħeb fl-Unjoni Ewropea.
Dan billi waħda mill-kundizzjonijiet hija li l-Kroazja għandha timplimenta leġiżlazzjoni kontra d-diskriminazzjoni.
Quddiem dan kollu, Vlatko Markovic, li għandu 73 sena u bħalissa għaddej b'kampanja biex ikun elett għar-raba' darba bħala l-president tal-federazzjoni tal-futbol f'pajjiżu, skuża ruħu u insista li kien miftiehem ħażin.
Għal din id-dikjarazzjoni, il-gruppi Kroati għad-drittijiet tal-persuni 'gay', Kontra u Iskorak saħqu li jekk tassew irid juri s-sinċerità tad-dispjaċir tiegħu għal dak li qal, Markovic għandu jxejjer il-'bandiera tal-qawsalla' waqt il-logħba li l-Kroazja se tilgħab kontra Malta illum l-Erbgħa, fil-kwalifikazzjonijiet għall-Euro 2012.
Ir-rimarki ta' Vlatko Markovic kienu segwiti b'appell li sar mill-plejer Ġermaniż ta' Bayern Munich, Mario Gomez, li qal li l-plejers 'gay' għandhom jagħmlu kuraġġ u jiddikjaraw l-orjentazzjoni sesswali tagħhom. Hu qal li meta jagħmlu dan, huma jħossuhom bħallikieku ġew illiberati waqt li kompla jgħid li wasal iż-żmien li wieħed ma jibqax jittratta l-omosesswalità bħala "suġġett taboo".
Anke l-kummenti ta' Mario Gomez qanqlu diskussjoni sħiħa għax kien hemm min wissa li f'każ ta' plejers attivi, dikjarazzjoni dwar l-orjentazzjoni sesswali tagħhom tista' toħloqilhom pressjoni kbira fuqhom.
Il-President tal-Federazzjoni tal-Futbol Ġermaniża, Theo Zwanziger, li kien ġie mfaħħar ħafna meta qal li kien lest li jisma' u jgħin lil dawk il-plejers gay li jridu jiddikjaraw pubblikament l-orjentazzjoni sesswali tagħhom, esprima l-iskantament tiegħu li l-futbol professjonali għadu wieħed mill-ftit oqsma fil-ħajja pubblika fejn l-omosesswalità għadha meqjusa bħala 'taboo'.
"Fil-politika, l-arti u l-kultura m'għadhiex aktar problema iżda fil-futbol professjonali jidher li għadha," huwa qal.
L-esperta tal-midja Ġermaniża, Tatjana Eggeling qalet waqt il-programm televiżiv ZDF Sportstudio li "xi plejers 'gay' fil-Ġermanja u anke fl-Italja saħansitra jirranġaw żwiġijiet foloz" f'attentat li jaħbu l-orjentazzjoni sesswali tagħhom.
Ta' min jgħid li l-eks-kap tal-federazzjoni tal-futbol Awstrijakka, Otto Baric, kien immultat mill-UEFA wara li fis-sena 2004 kien qal: "Naf li m'hemm l-ebda omosesswali fit-tim tiegħi. Kapaċi ninduna b'persuna 'gay' f'inqas minn għaxar minuti, u lil dawn ma rridhomx fit-tim tiegħi." |
No comments:
Post a Comment